ပို့ဆောင်ရေးနှင့် ဆက်သွယ်ရေးဝန်ကြီးဌာန၊ သတင်းအချက်အလက်နည်းပညာနှင့် ဆိုက်ဘာလုံခြုံရေးဦးစီးဌာန၏ လမ်းညွှန်မှုဖြင့် မြန်မာနိုင်ငံကွန်ပျူတာအသင်းချုပ်နှင့် US ICT Council တို့ ပူးပေါင်း၍ Myanmar Cybersecurity Month (MCM) 2020 ကို ၂၀၂၀ ပြည့်နှစ်၊ အောက်တိုဘာလ တစ်လလုံး “Do Your Part, #BeCyberSmart.” Theme ဖြင့် ကျင်းပပြုလုပ်သွားမည်ဖြစ်ပါကြောင်းသတင်းစာရှင်းလင်းပွဲအား ၁၂-၁၀-၂၀၂၀ ရက်နေ့၊ နံနက် (၁၀:၀၀) Video Conferencing စနစ်ဖြင့် ကျင်းပပြုလုပ်ခဲ့ရာ မြန်မာနိုင်ငံကွန်ပျူတာအသင်းချူပ် ဒုတိယဥက္ကဋ္ဌ ဦးရဲရင့်ဝင်း၊ တွဲဖက်အတွင်းရေးမှူး ဒေါ်အေးအေးသင်း၊ အလုပ်အမှုဆောင်များဖြစ်ကြသော ဦးငြိမ်းဦး၊ ဦးဇော်ဝင်းထွန်း နှင့် ဒေါက်တာမျိူးနိုင်တို့မှ တက်ရောက်ခဲ့ကြပါသည်။
သတင်းစာရှင်းလင်းပွဲတွင် US ICT Council ၏ Executive Director Ms. Gertchen Kuze မှ ကြိုဆိုနှုတ်ခွန်းဆက်စကား ပြောကြား၍ Myanmar Cyber Security Month 2020 တွင် ပြုလုပ်မည့် အကြောင်းအရာများအား ရှင်းလင်းပြောကြားပါသည်။
ဆက်လက်၍ မြန်မာနိုင်ငံကွန်ပျူတာအသင်းချူပ် ဒုတိယဥက္ကဋ္ဌ ဦးရဲရင့်ဝင်းက မိန့်ခွန်းပြောကြားရာတွင် လက်ရှိ မြန်မာနိုင်ငံတွင် COVID-19 ကာလ၌ ဒီဂျစ်တယ်နည်းပညာများ၏ တန်ဖိုးကို အကျိူးရှိစွာ အသုံးချလာလျှက်ရှိသော်လည်း အခြားတစ်ဖက်တွင် လူများသတိထားရမည့် အန္တရာယ်များနှင့်ဆိုးကျိုးများရှိနေသဖြင့် ဆိုက်ဘာလုံခြုံရေးနှင့် ပတ်သက်သော အသိပညာမြှင့်တင်ရန် အလွန်အရေးကြောင်းပြောကြားပြီး မြန်မာနိုင်ငံကွန်ပျူတာအသင်းချူပ်နှင့် ကွန်ပျူတာအသင်းများမှလည်း ဆိုက်ဘာလုံခြုံရေးနှင့်ပတ်သက်၍ ကူညီဆောင်ရွက်သွားရန်အသင့်ရှိကြောင်း ပြောကြားခဲ့ပါသည်။
ထို့နောက် ပို့ဆောင်ရေးနှင့်ဆက်သွယ်ရေးဝန်ကြီးဌာန၊ သတင်းအချက်အလက်နည်းပညာနှင့် ဆိုက်ဘာလုံခြုံရေးဦးစီးဌာန၊ အမျိူးသားဆိုက်ဘာလုံခြုံရေးဌာန ညွှန်ကြားရေးမှူး ဦးရဲနိုင်မိုးက COVID-19 ကူးစက်ရောဂါကြောင့် မြန်မာနိုင်ငံသားများအား ဆိုက်ဘာလုံခြုံရေးအန္တရာယ်များနှင့် ခြိမ်းခြောက်မှု့များမှ ကာကွယ်ရန်အတွက် မြန်မာဆိုက်ဘာလုံခြုံရေးကျွမ်းကျင်သူများနှင့် ပူးပေါင်းဆောင်ရွက်နေပြီး ဆိုက်ဘာလုံခြုံရေးနှင့်ပတ်သက်၍လည်း သတိထားရန်လည်း လိုအပ်ကြောင်း ရှင်းလင်းပြောကြားပါသည်။
ဆက်လက်၍မြန်မာနိုင်ငံရဲတပ်ဖွဲ့ဌာနချုပ်၊ မှုခင်းရဲတပ်ဖွဲ့၊ နည်းပညာမှုခင်းဌာန ရဲမှူးကြီး ဦးညွှန့်ဝေက ဆိုက်ဘာလုံခြုံရေးဆိုသည့်အရာကို ပြည်သူများနားလည်ရန်လိုအပ်ပြီး သတင်းအချက်အလက်များလည်း အမြဲနားစွင့်နေရန်လိုအပ်ကြောင်း ဆွေးနွေး ရှင်းလင်းပြောကြားပါသည်။
ဆက်လက်၍ အခြားတာဝန်ရှိသူများမှလည်း ဆွေးနွေးပြောကြားကြပြီး တက်ရောက်လာသည့်သတင်းမီဒီယာများ၏ မေးမြန်းချက်များကို တာဝန်ရှိပုဂ္ဂိုလ်များက ဖြေကြားခဲ့ပါသည်။
မြန်မာနိုင်ငံကွန်ပျူတာအသင်းချူပ်
